सरकार र एमाओवादीबीच चारबुँदे सहमति विषयमा वार्ता हुँदै
Admin / 2014-08-28 01:55:32
नेपाल ब्युरो– भदौ १२, काठमाडौ ।
सरकार र एकीकृत माओवादीबीच चारबुँदे सहमति कार्यान्वयनका विषयमा वार्ता हुँदैछ ।
सत्तारुढ दलहरुले चारबुँदे सहमति कार्यान्वयनका विषयमा प्रमुख प्रतिपक्षी दल एकीकृत माओवादीसँग छलफल गर्ने भएका छन् ।
४ बुँदे सहमतिमा भएको उच्चस्तरीय राजनीतिक सयन्त्र गठन नभए संसद अवरुद्ध गर्ने प्रतिपक्षीको चेतावनीपछि सत्तासिन दलले आज छलफल गर्न लागेको सरकारका प्रवक्ता एवम् सूचना तथा सञ्चारमन्त्री डाक्टर मीनेन्द्र रिजालले जानकारी दिनुभयो ।
संसद बैठक भोलिका लागि बोलाइएको छ । भोलिका लागि बोलाईएको व्यवस्थापिका संसदको बैठक आफ्ना माग पुरा नभए संसद चलन नदिने एकीकृत माओवादीले यसअघि नै चेतावनी दिइसकेको छ । छलफल साँझ प्रधानमन्त्रीको सरकारी निवास वालुवाटारमा हुने मन्त्री रिजालले जानकारी दिनुभयो ।
त्यसैगरी आजै संविधानसभा बाहिर रहेको नेकपा माओवादीसँग पनि छलफल हुनेछ । उसले भनेको गोलमेच सभा बोलाउने विषयमा छलफल हुने बुझिएको छ ।
यसैबीच उच्चस्तरीय राजनीतिक संयन्त्र गठनको विषयमा नेपाली काँग्रेसभित्र आन्तरिक विवाद बढेको छ । पार्टी सभापति सुशील कोइराला प्रधानमन्त्री बनेपछि खासै विवाद नदेखिएको कांग्रेसमा उच्चस्तरीय समितिको विषयले भने नेता शेरबहादुर देउवा पक्ष र संस्थापन पक्षबीच विवाद उत्पन्न भएको छ । सत्तारुढ घटकले उच्चस्तरीय राजनीतिक समितिको औचित्य नभएको बताइरहेका बेला सरकारका एक जना वरिष्ठ मन्त्रीले भने उच्चस्तरीय समिति बनाउनुपर्ने धारणा राख्नुभएको छ । देउवा पक्षका नेता तथा भौतिक योजना मन्त्री विमलेन्द्र निधिले यस्तो समिति बन्दा कुनै समस्या नहुने धारणा राख्नुभएको हो ।
उहाँले संविधानसभालाई सघाउन प्रमुख दलहरूबीच उच्चस्तरीय राजनीतिक संयन्त्र बनाउँदा केही फरक नपर्ने बताउँनुभयो । तर, प्रधानमन्त्री कोइराला र उपसभापति रामचन्द्र पौडेल भने यस्तो समिति बनाउन नहुने पक्षमा हुनुहुन्छ ।
प्रकाशित मिति: 2014-08-28 01:55:32
प्रतिक्रिया: