छुट्टाछुट्टै स्थानमा भएको दुर्घटनामा ४ को मृत्यु
Admin / 2014-06-13 05:49:45
नेपाल ब्युरो– जेठ ३०, काठमाडौँ ।
देशको छुट्टाछुट्टै स्थानमा भएको दुर्घटनामा परि ४ जनाको मृत्यु भएको छ ।
महोत्तरी जिल्लाको सिमरदही गाविसमा हिजो साँझ घरको आँगनमै रहेको खाल्टोको पानीमा डुबेर एक बालकको मृत्यु भएको छ । मृत्यु हुनेमा सिमरदही गाविस–५ बस्ने नरिस अन्सारीका दुई वर्षका छोरा दिलसन अन्सारी रहेको जिल्ला प्रहरी कार्यालयले जनाएको छ ।
उता करेन्ट लागेर चितवनको पोल्ट्री फार्ममा काम गर्ने एक मजदुरको मृत्यु भएको छ । भरतपुर नगरपालिका–१४ स्थित अविनास पोल्ट्री फार्ममा काम गर्ने मजदुरको करेन्ट लागेर मृत्यु भएको प्रहरीले जनाएको छ । बारा घर भई पोल्ट्री फाममा काम गर्दै आएका २३ वर्षीय रामकिशोर शाहको मृत्युभएको जिल्ला प्रहरी कार्यालय चितवनले जनाएको छ ।
नुवाकोटको पञ्चकन्या गाविसमा चट्याङ लागेर एक महिलाको ज्यान गएको छ । गएराति हावाहुरीसँगै परेको चट्याङ लागेर वडा नम्बर ७ कात्तिकेकी ४९ वर्षीय सुशीला तामाङको घटना स्थलमै ज्यान गएको हो ।
यता मिनीट्रकको ठक्करबाट घाइते भएकी सिरुटार–५ की एक महिलाको उपचारका क्रममा मृत्यु भएको छ । जिल्लाको बालकोट गाविस माइक्रोबस पार्कमा गएराति बा२ख ४४२२ नम्बरको मिनीट्रकले ७२ वर्षीया गीता कार्कीलाई ठक्कर दिएको महानगरीय प्रहरी वृत्त थिमीले जानकारी दिएको छ ।
कार्कीको बानेश्वरस्थित एभरेस्ट अस्पतालमा उपचारका क्रममा गएरातिनै मृत्यु भएको हो ।
प्रकाशित मिति: 2014-06-13 05:49:45
प्रतिक्रिया: