अघिल्लो वर्षको नेपाल फ़ेष्टिवलको हिसावकिताव सार्बजनिक
Admin / 2014-07-13 09:40:19
टोकियो – अघिल्लो वर्ष अर्थात सन् २०१३ मा टोकियोमा नेपाल फेष्टिवल आयोजना गरेको उमन कमिटीले उक्त फेष्टिवलको आय ब्यय हिसाब किताव आज सार्बजनिक गरेको छ ।
सो कमिटीले आज टोकियोमा एक समारोहको आयोजना गरी हिसाब किताबको विवरण सार्बजनिक गरेको हो ।
सार्बजनिक गरिएको विवरणअनुसार फेष्टिवलको कुल आम्दानी ५,१४१,५२८ येन र कुल खर्च ४,४१४,५७९ येन रहेको जानकारी गराईएको छ । तदअनुरुप आम्दानीबाट खर्च कटाई ७२६,९४९ येन बचत रहेको जानकारी गराईयो ।
बाँकी रहेको मौज्दात रकमलाई विभिन्न परोपकारी कार्यमा खर्च गरिने जानकारी पनि गराईएको थियो। जसअनुसार जापानमै रहेका नेपाली महिलाहरुलाई भईपरी आउने कार्यमा सहयोग गर्ने उद्देश्यले खडा गरिने अक्षय कोषमा २७६,९०० येन, म्याग्दी जिल्लाको कुइनेमंगले गाबिसस्थित रितुङ माविको पुस्तकालय निर्माणमा सहयोगार्थ ५०,००० येन, जेहेन्दार छात्राको लागि ५०,००० येन, रक्षा नेपाललाई सहयोग ४०,००० येन, पुष्पा बस्नेतको अभियानलाई सहयोग २०,००० येन, आर्य तारा स्कुललाई सहयोग २०,००० र यो वर्षको नेपाल फेष्टिवल आयोजक समितिलाई ५०,००० येन सहयोग गरिने घोषणा गरिएको छ ।
सो अवसरमा यो वर्षको नेपाल फेष्टिवल आयोजनाका लागि सहयोग राशी ५०,००० येन एनआरएन जापानका उपाध्यक्ष सुदन थापालाई हस्तान्तरण गरियो । यसैगरी म्याग्दी जिल्लाको कुइनेमंगले गाबिसस्थित रितुङ माविको पुस्तकालय निर्माण सहयोगार्थ टिका छन्त्याललाई ५०,००० येन हस्तान्तरण गरियो । उक्त सहयोग रकम उमन कमिटीका अध्यक्ष युको ओकामोतो मल्लले हस्तान्तरण गरेका थिए ।
कार्यक्रममा विविध कारणवश हिसाबकिताब सार्बजनिक गर्न ढिला हुन गएको जानकारी गराउँदै सो कमिटीकी उपाध्यक्ष अनिता गुरुङले अघिल्लो वर्षको फेष्टिबल आयोजना गर्दाको अनुभव सुनाएका थिए भने सो कमिटीकी सदस्य मनिता श्रेष्ठले आर्थिक प्रतिबेदन प्रस्तुत गरेका थिए । कार्यक्रममा विभिन्न संघसंस्थाका प्रतिनिधि लगायत मिडियाकर्मीहरुको उपस्थिति रहेको थियो ।
अघिल्लो वर्ष नेपाली महिलाहरुको एक समुहको आयोजना र विभिन्न संघसंस्थाहरुको सहकार्यमा नेपाल फेष्टिवलको आयोजना गरिएको थियो ।
प्रकाशित मिति: 2014-07-13 09:40:19
प्रतिक्रिया: