आज तीजको दर खाने दिन
Admin / 2014-08-27 03:53:04
नेपाल ब्युरो– भदौ ११, काठमाडौ ।
नेपाली हिन्दू नारीहरुको महान चाड हरितालिका तीज आजबाट सुरु भएको छ ।
हिन्दु नारीहरुले मान्ने विशेष पर्व हरितालिका तीज आजदेखि सुरु भएको हो ।
हरितालिका तिज अन्तरगतको पहिलो दिन आज दर खाएर मनाउन लागिएको छ । तिजको ब्रत बस्ने हिन्दु महिलाले विभिन्न परिकार तथा मिठाई तयार पारेर आज राति अबेर दरको रुपमा खाने प्रचलन छ ।
विवाहित महिलाले पतिको दीर्घायुको कामना तथा अविवाहितहरुले सुयोग्य पतिको माग गर्दै भोलि पल्ट निराहार व्रत बस्ने भएकाले अघिल्लो दिन दर खाने प्रचलन रहेको हो । घरघरमा खासगरी दूधबाट निर्माण गरिएका मिठामिठा परिकार तयार गरी दर खाने चलन रहेको छ । महिलाहरु यो दिन माछामासु वाहेक खिर, ढकने र सेलरोटी खाने गर्दछन् ।
आज विवाहित महिलाहरु माइतीघरमा भेला भएर वा आफ्नै घरमा खीर, ढकनी, घिउ, दही, दुध लगायतका मिठा परिकार खाने गर्दछन् । पौराणीक कथन अनुसार हिमालयकी पुत्री पार्वतीले महादेव पति पाउनका लागि कठोर ब्रतगरी आफ्नो कामना पुरा गरेको धार्मिक कथन अनुसार यो पर्व मनाइदै आएको पाइन्छ । आज दर खाएर ब्रत लिनेहरु भोलि विभिन्न तिर्थस्थल, मन्दिर तथा देवालयमा गइ शिव पार्वतीको पुजा उपासना गरेर तीज सम्वन्धि गीत, भजन र चुट्का गाएर यो पर्व मनाउँछन् ।
उता डडेल्धुरामा सुदूरपश्चिमकै एकताको प्रतिक मानिने सांँस्कृतिक र लोकप्रिय गौरापर्वको रौनक देखिन थालेको छ । आगामी भदौ १७ गतेबाट शुरु हुने पर्वको रँौनक करिव एक हप्ता अघिबाटै सुरु भएको हो ।
नारीहरुको महत्वपूर्ण चाड गौरापर्वमा भगवान शिबलाई महेश्वर र पार्वतीलाई गौराको रुपमा पूजा गरी भाद्र शुक्ल पञ्चमीदेखि एक हप्तासम्म भव्यतापूर्वक मनाउने गरिन्छ ।
अहिले महिलाहरु गौरापूजन सामग्री किन्न व्यस्त भएको बताइएको छ ।
बैदिककालमा हैह्यबंशीका शुरबीरहरुको अत्याचारबाट भृगुबंशीका ब्राह्मणीहरुको अस्तित्व सुरक्षा गर्न देवी उमा गौरीको आरधनाको प्रभाबले संकट पार गरेको भन्ने कथन अनुसार यो पर्व मनाइन्छ ।
यस पर्वमा गरिने व्रतबाट सु–स्वास्थ्य एवं सौभाग्य र समृद्धि प्राप्त हुन्छ भन्ने नारीहरुमा अटल विश्वास रहेको पाईन्छ भने गौरा पर्वमा वर्षभरिमा गरिने कार्य व्यस्तताबाट थकाई मार्ने अवसर र आफन्तजनको भेटघाटको पर्वको रुपमा पनि यसलाई लिने गरिन्छ ।
प्रकाशित मिति: 2014-08-27 03:53:04
प्रतिक्रिया: