विवादित विषयमा सहमति जुटाउन दलहरु तीब्र कसरतमा
Admin / 2014-09-02 02:29:45
नेपाल ब्युरो– भदौ १७, काठमाडौ ।
संविधानका बाँकी विवादित विषयमा तोकिएकै समयभित्र सहमति जुटाउन दलहरु छलफल गर्दैछन् ।
पूर्व–निर्धारित कार्यतालिका अनुसार नयाँ संविधानका अन्तरवस्तुमा सहमति जुटाउने समय ४ दिनमात्र बाँकी रहँदा प्रमुख ३ दलले नेकपा माओवादी समेतलाई राखेर आज संयुक्त छलफल गर्ने भएका छन् ।
मोहन वैद्य नेतृत्वको नेकपा माओवादीले माग गरेजस्तै सर्वपक्षीय राजनीतिक–सभा गरेर संविधानका अन्तरवस्तुमा सहमति जुटाउनुपर्ने शर्त एकीकृत माओवादीले अघि सारेपछि कंग्रेस, एमालेले २ माओवादी पार्टीसंग त्यसबारे संयुक्त छलफल गर्न लागेका हुन् ।
४ दलको बैठकका लागि बालुवाटारस्थित प्रधानमन्त्री निवासमा अपरान्ह १ बजे बोलाइएको छ । एकीकृत माओवादीले बैद्य माओवादीसंग सहमतिपछिमात्र प्रमुख दलहरुबीच औपचारिक छलफल अघि बढाउनुपर्ने अडान लिएको छ । संविधानसभाले निर्धारित गरेको कार्यतालिका अनुसार, दलहरुले भावी संविधानका विवादित अन्तरवस्तुमा भदौ २१ गतेभित्र सहमति जुटाइसक्नु पर्नेछ ।
प्रकाशित मिति: 2014-09-02 02:29:45
प्रतिक्रिया: